Bordhøgd, plassbehov og golv

Maskina tek meir plass enn ho ser ut til

Ei einhovuds fleirnålsmaskin som SEWTECH ST-1201 står på eit stålstativ og veg typisk 130-200 kg ferdig montert. Sjølve kroppen er ikkje så brei, men pantografen - rammearmen som flyttar broderiramma - køyrer ut til begge sider og bakover medan maskina broderer. Det er rørslerommet til pantografen som styrer plassbehovet, ikkje målet på maskinkroppen.

Rekn slik når du teiknar opp plassen:

• Bak maskina: minst 60 cm fri. Pantografen dreg ramma bakover, og du må kome til for å skifte spole på nokre modellar og for service.
• På kvar side: minst 50 cm fri. På ST-1201 med 360 x 200 mm flate svingar ramma godt ut til sidene, og på ST-1501 med opptil 400 x 600 mm treng du enda meir.
• Framfor maskina: minst 90 cm. Det er her du står, hoopar, og legg plagg.
• Totalt golvareal: rekn 2,5 x 2 meter som eit realistisk minimum for ei maskin med arbeidsplass rundt.

Eit klassisk nybyrjarfeil er å sette maskina inntil ein vegg med 20 cm klaring bak. Då slår ramma i veggen midt i ein jobb, plagget blir øydelagt og i verste fall bøyer du rammearmen.

Bordhøgd og arbeidshøgd

Stativet som følgjer med er som regel høgdejusterbart eller har ei fast høgd som gir broderiflata omtrent 90-100 cm over golvet. Det er med vilje: du skal kunne hoope stående utan å bøye ryggen, og du skal sjå rett ned på nålepunktet.

Hooping gjer du helst på eit eige bord ved sida av maskina, ikkje på maskina. Det bordet bør vere 90-95 cm høgt - altså høgare enn eit vanleg spisebord på 75 cm. Skal du hoope hundre plagg på ein dag, er 15 cm feil bordhøgd forskjellen på ein grei dag og vondt i korsryggen.

Set av eit avlastingsbord i tillegg: eitt for uhoopa plagg inn, eitt for ferdige plagg ut. Utan det endar alt på golvet.

Golv, vibrasjon og lys

Maskina går opptil 1200 sting i minuttet. Kvart sting er ei brå rørsle, og pantografen akselererer og bremsar ramma mange gonger i sekundet. Det gir vibrasjon.

• Betonggolv er best. Set maskina rett på golvet, juster føtene, ferdig.
• Trebjelkelag i eit gamalt hus svingar med. Du kan få stingfeil og støy gjennom heile huset. Sett maskina så nær ein berande vegg eller ein bjelke som råd, aldri midt på eit langt spenn.
• Vibrasjonsdemparar eller gummimatter under føtene tek mykje av lyden, men ikkje bruk noko så mjukt at maskina kan vagge. Ho skal stå knallstøtt.
• Ikkje sett maskina på eit vanleg trilleunderlag eller eit bord med hjul.

Lys er undervurdert. Du skal sjå ein trådende på svart tråd mot svart stoff. Rekn med minst 500-750 lux over arbeidsplassen, gjerne ein eigen lampe med nøytralt kvitt lys (4000 K) rett over nåleområdet. Maskinlyset som følgjer med er hjelpelys, ikkje arbeidslys.

Klima i rommet

Tråd likar seg i 40-60 % relativ luftfukt. I ein norsk vinter med varmepumpe kan lufta bli så tørr at polyestertråd blir statisk og flisar seg. Er lokalet under 30 % fukt om vinteren, set inn ein liten luftfuktar. Temperatur: 18-26 grader. Ikkje sett maskina rett under eit varmluftsutløp eller framfor eit vindauge med sterk sol - lokal oppvarming av eine sida av maskina gir ujamn spenning.