Storleik, materiale og kva som faktisk går an

Broderiflata er ei hard grense

Broderiflata er det største området pantografen kan flytte ramma over. Det er ikkje eit forslag - er designet éin millimeter for stort, køyrer maskina ikkje.

• SEWTECH ST-1201: 360 x 200 mm
• SEWTECH SC-1501: 360 x 200 mm
• SEWTECH ST-1501: opptil 400 x 600 mm

Men den reelle grensa er alltid mindre enn maksflata, fordi ramma tek plass. Ei ramme har ein rammekant, og du treng klaring mellom design og ramme. Rekn med at du praktisk brukar 2-3 cm mindre i kvar retning enn den nominelle flata.

Eit vanleg spørsmål: kan eg brodere ein stor rygglogo på 30 x 40 cm? På ST-1201 med 360 x 200 mm: nei, ikkje i eitt oppsett. Du må enten dele designet i to og hoope om (krev nøyaktig oppretting), eller bruke ei maskin med større flate. På ST-1501 med 400 x 600 mm går det greitt.

Kor liten tekst kan du brodere?

Dette er den vanlegaste kjelda til skuffa kundar.

Med 40 wt tråd og 75/11 nål er den praktiske grensa for lesbar satinsømtekst omtrent 5 mm bokstavhøgd for versalar, og 6 mm for gemenar med staker og løkker. Under det byrjar bokstavane å fylle seg att - løkka i a, e og o blir ein flekk.

Vil du lengre ned, må du endre oppsettet:

• 60 wt tråd i overtråden og 65/9 nål kan gi lesbar tekst ned mot 3,5-4 mm.
• Bruk serif-fri, open skrifttype. Tynne serifar forsvinn.
• Bruk cut-away og toppfilm, og sett farten ned til 500-600 sting/min.

Seier kunden "berre gjer teksten litt mindre", forklar at broderi ikkje er trykk. Ein bokstav er bygd av tråd med ei fysisk tjukn, og under ei viss storleik finst ikkje detaljen.

Materiale: lett, vanskeleg, uaktuelt

Lett:

• Piké, T-skjorte, collegegensar (med cut-away)
• Vevd bomullsskjorte
• Canvas og arbeidsjakke i bomull/poly
• Fleece (med toppfilm)
• Filt, ullstoff
• Bomullsposar og handlenett

Vanskeleg, men fullt mogleg med rett oppsett:

• Frotté - krev toppfilm, elles søkk stinga i luggen
• Softshell og vindtett - nålehola blir verande. Vurder om plagget skal vere vasstett
• Strikk med grov maske - treng tett underlag og toppfilm
• Dunjakker - nålehola slepp ut dun. Krev spesialteknikk og ofte eit lag mellomlegg som tettar
• Skinn og skinnimitasjon - kvart nålehol er permanent. Ingen sjanse til å sprette opp. Bruk skarp nål, låg stingtettleik, og aldri hoop stramt
• Caps - eigen disiplin med capsystem

Uaktuelt eller sterkt frårådd:

• Ferdigsydde stader du ikkje får hoopa: tettsydde lommer, doble kragar, tronge ermar utan sideopning
• Tynn silke og chiffon utan tung stabilisering
• Belagt regntøy der brodering øydelegg vasstettleiken (informer kunden skriftleg)
• Fotorealistiske motiv med jamne fargeovergangar - broderi er tråd, ikkje piksel

Sting og tettleik

Eit rimeleg design har ein stingtettleik som passar materialet. Til orientering:

• Venstrebryst-logo, 9-10 cm brei: typisk 5000-10 000 sting
• Rygglogo, 25-30 cm brei: typisk 25 000-60 000 sting
• Caps-front: typisk 4000-9000 sting
• Namn i tekst, 15 bokstavar: typisk 1500-3000 sting

Designfila avgjer alt. Ei dårleg digitalisert fil på 20 000 sting kan sjå verre ut enn ei god på 7000, og ho tek tre gonger så lang tid. Digitalisering er eit eige fag - vi kjem tilbake til det seinare i skulen.