Nivellering og første oppstart

Kvifor nivellering betyr noko

Ei broderimaskin som står skeivt får ujamn belastning på pantografen og på lagera. I praksis merkar du det som:

• Ujamn stingkvalitet i den eine enden av broderiflata
• Meir vibrasjon og støy
• Skeiv rammeposisjon i høve til plagget
• Auka slitasje over tid

Det tek ti minutt å nivellere. Det er ti minutt godt brukt.

Slik nivellerer du

Du treng eit vater på minst 30 cm, helst 60. Eit mobilvater duger ikkje - han er for unøyaktig.

1. Sett maskina der ho skal stå permanent.
2. Legg vateret på flatbordet eller på ei plan flate på maskinkroppen, ikkje på stativet.
3. Mål på tvers (venstre-høgre) først. Juster føtene på stativet til bobla står midt i.
4. Mål på langs (fram-bak). Juster.
5. Gå tilbake og mål på tvers igjen - dei påverkar kvarandre.
6. Gjenta til begge retningar er i vater.
7. Sjekk til slutt at alle fire føtene ber. Ein fot som heng i lause lufta gjer at maskina vaggar sjølv om ho er i vater. Trykk på kvart hjørne og kjenn etter.
8. Lås kontramutrane på føtene.

Mål på nytt etter ei veke. Nye stativ set seg litt.

Før du slår på straumen

Gå gjennom denne lista, i denne rekkjefølgja:

1. Alle transportsikringar er av - dette er siste sjanse
2. Ingen verktøy, skruar eller emballasjerestar ligg i eller på maskina
3. Pantografen går lett for hand i begge retningar
4. Det er ingen ting i rørslerommet til ramma
5. Flatbordet er montert (eller capdrivaren, om du skal køyre caps)
6. Spenninga er 230 V og kursen er som skildra i nivå 0
7. Hovudbrytaren står av når du set i støpselet
8. Ingen tråd er lagd enno - første oppstart gjer du utan tråd

Første oppstart

Slå på hovudbrytaren.

Maskina gjer typisk dette:

1. Skjermen startar opp og viser logo og programvareversjon
2. Referansekøyring: pantografen køyrer til ytterpunkta sine for å finne origo. Dette kan sjå dramatisk ut første gongen - det er normalt.
3. Hovudakselen roterer til topp-posisjon, slik at nålestonga står oppe
4. Maskina viser hovudskjermen og er klar

Rør ingenting under referansekøyringa. Er det noko i vegen, slå av straumen med ein gong.

Høyr etter uvanlege lydar: skraping, hakking, metall mot metall. Ein ny maskin skal gå jamt. Ein tydeleg ny lyd er grunn til å stoppe og ringe Kreatek.

Første innstillingar

Gjer desse med ein gong, før du gjer noko anna:

• Språk i systemmenyen
• Dato og klokke - blir brukt i statistikk og feilloggar
• Maks fart: sett ned til 700-800 sting/min dei første timane. Ei ny maskin skal køyrast inn, og du skal lære deg henne. Auk gradvis.
• Rammestorleik til den ramma som faktisk sit på
• WiFi om du skal bruke det

Første testkøyring utan tråd

Før du legg tråd, køyr eit lite design utan tråd og utan stoff, med tom ramme montert.

Dette gjer to ting: du ser at pantografen bevegar seg jamt over heile flata, og du høyrer korleis maskina går. Du kan også sjå at nålene går ned i nålhòlet i stingplata utan å ta i kanten.

Let du hovudet gå ned i eit hòl der nåla treffer kanten av stingplata, stopp med ein gong. Det tyder på ei bøygd nål eller ei feiljustert nålestong.

Smøring før du byrjar

Ei ny maskin er smurt frå fabrikk, men ho har stått lenge i transport og olja kan ha runne av griparen. Gi griparen ein dropp olje før første ordentlege køyring, og følg smøreplanen i manualen frå dag ein. Set ei påminning på telefonen eller bruk servicepåminninga i menyen.