Stativ, utpakking og transportsikringar

Ta imot leveransen

Maskina kjem på pall, som regel i ein trekasse eller kraftig papp med skumforing. Ho veg mykje - maskinkroppen aleine er tung nok til at du treng minst to personar, og helst ein pallejekk inn i lokalet.

Før sjåføren køyrer:

1. Sjå over emballasjen for transportskade: hol, klemskade, våte flekker, brotne bord.
2. Sjekk om det er ein støtindikator (tiltsensor eller sjokkindikator) på kassa. Er han utløyst, noter det.
3. Ta bilete av pallen som han står, frå fleire vinklar.
4. Er det synleg skade, noter det på fraktbrevet før du signerer. Signerer du utan merknad, blir det vanskeleg å nå fram med krav seinare.
5. Meld frå til Kreatek i Volda same dag ved skade.

La maskina stå i emballasjen til ho er på plass i rommet der ho skal stå. Ikkje pakk ut ute eller i ei kald garasje - kald metall som kjem inn i varmt rom får kondens. La ho stå og temperere i 4-6 timar dersom ho har vore under 5 grader.

Pakk ut

Opne ovanfrå. Ta av lokk og sider slik at du kan løfte rett opp i staden for å dra ut sidevegs.

Legg alle esker og posar med tilbehør på eit bord og sjekk mot pakkelista. Til ST-1201 skal du finne:

• 5 rammestorleikar, to av kvar
• Capsystem med stasjon og drivar
• Flatbord
• Stålstativ i delar
• Automatisk spolevindar
• Verktøykasse med skrunøklar, skrutrekkjarar, oljekanne, pinsett, børste og reservenåler
• Straumkabel, USB-pinne, manual

Manglar noko, meld frå med ein gong. Ta vare på emballasjen i minst garantiperioden på 12 månader dersom du har plass - må ein del sendast, er original emballasje det tryggaste.

Monter stativet

Stativet blir montert først, tomt, før maskina blir sett oppå.

1. Legg delane utover og sorter etter pakkelista.
2. Skru saman sidene og tverrstivarane, men dra ikkje til fullt før alt er på plass. Då får du dei siste boltane inn utan å slite.
3. Sjekk at stativet står plant og utan vindskeivheit - alle fire føtene skal ta i golvet.
4. Dra til alle boltar i kryss, jamt.
5. Sett på justerbare føter og skru dei omtrent midt i vandringa, slik at du har rom til å justere begge vegar seinare.

Løft maskina på plass

Dette er punktet der folk skader både seg sjølv og maskina.

• Minst to personar. Helst tre, eller ein liten kran/traverskran om du har.
• Løft i dei punkta manualen viser, aldri i pantografen, aldri i rammearmen, aldri i trådstativet, aldri i hovudet.
• Ha ein plan for kvar du set ho ned før du løftar.
• Bolt maskina fast til stativet med dei skruane som følgjer med, alle saman.

Transportsikringar - det viktigaste punktet

Maskina er sikra for transport med skruar, braketter, stroppar eller klosser som låser dei rørlege delane. Dei er som regel raude eller gule, eller merkte med ein lapp.

Typiske stader:

• På pantografen / X- og Y-aksen - klosser eller braketter som hindrar at rammearmen sklir i transport
• På nålestongkassa - kile eller skrue som hindrar at kassa vandrar sidevegs
• På hovudet - av og til ei låsestong på nålestongdrivverket
• Under bordplata ved griparen på nokre modellar
• Skumklossar stukne inn mellom rørlege delar

Alle skal av før første oppstart. Startar du maskina med ei sikring på, prøver servomotoren å flytte noko som er bolta fast. Resultatet kan bli tapte steg, skada reim, bøygd akse eller havarert motor - og det er ikkje ein garantisak, fordi det går under feil installasjon.

Slik gjer du:

1. Gå rundt heile maskina med manualen i handa og finn kvar sikring på lista.
2. Ta dei av ein etter ein og legg dei i ein merkt pose. Du treng dei att om maskina skal flyttast seinare.
3. Gå ein runde til og sjå etter skum, tape og strips du kan ha oversett.
4. Flytt pantografen forsiktig for hand nokre centimeter i begge retningar - han skal gå lett. Går det tungt, sit det framleis noko fast.
5. Skyv ikkje nålestongkassa for hand.

Først når du er sikker på at alt er av, koplar du til straum.