Skjermen og menyen

Skjermen

SEWTECH ST-1201 har ein 10 tommars HD-berøringsskjerm med 19 språk. ST-1501 har ein 10 tommars LCD. Skjermen er styringa til heile maskina - det finst ingen knappar som gjer noko menyen ikkje gjer.

Det første du bør gjere er å setje språk. Finn språkinnstillinga i systemmenyen. Er norsk ikkje eit av dei 19 språka på din programvareversjon, vel engelsk framfor eit språk du ikkje les godt - all dokumentasjon og alle videoar bruker dei engelske omgrepa uansett.

Hovudflatene i menyen

Menyane varierer litt mellom programvareversjonar, men alle maskiner av denne typen har dei same funksjonsgruppene:

1. Designbibliotek / minne. Her ligg designa som er lagra i maskina. ST-1201 lagrar 800 design og har kapasitet for 100 millionar sting. Du kan lese inn frå USB eller over WiFi.

2. Filformat. Maskina les DST, DSB, DHB og DHE. DST er bransjestandarden og det du kjem til å bruke i 95 prosent av tilfella. Merk at DST ikkje inneheld fargeinformasjon - berre stoppkommandoar. Fargane set du sjølv i fargesekvensen.

3. Fargesekvens (needle assignment). Her fortel du maskina kva nål som skal brodere kva del av designet. Har designet 5 fargeblokker, set du 5 nålenummer. Dette er den viktigaste innstillinga i heile menyen, og den vanlegaste kjelda til feil.

4. Design-innstillingar. Rotasjon (0, 90, 180, 270 grader og fritt), spegling, skalering (typisk 80-120 % utan å endre stingtettleiken merkbart), og plassering av senterpunkt.

5. Rammeval og rammegrense. Vel den ramma som faktisk sit på. Maskina brukar dette til å hindre kollisjon.

6. Fart. Maks 1200 sting/min. Set ned til 600-800 for caps, liten tekst, metallisk tråd og vanskelege materiale.

7. Trace / omriss. Maskina køyrer omkrinsen av designet utan å sy, slik at du ser at alt får plass.

8. Laser. Den raude laserposisjoneringa viser kvar første sting kjem. Bruk han saman med eit kryss eller ein merkelapp på plagget for å treffe rett.

9. Sting fram / sting tilbake. Køyrer designet framover eller bakover utan å sy. Uunnverleg etter trådbrot og etter straumbrot.

10. Statistikk og service. Stingtal, driftstimar, feilloggar og påminningar om smøring.

Fast rutine før kvar jobb

Bruk same rekkjefølgje kvar gong. Då gløymer du ikkje eit steg.

1. Last designet frå USB eller WiFi
2. Sjekk stingtal og storleik på skjermen mot det du forventar
3. Set fargesekvensen - kva nål til kva blokk
4. Vel rammestorleik
5. Set rotasjon og plassering
6. Set fart etter materiale
7. Fest ramma i pantografen
8. Bruk laseren til å plassere startpunktet
9. Køyr trace og sjå at alt får plass
10. Sjekk at rett nål har rett tråd fysisk på maskina
11. Start

Punkt 10 er det folk hoppar over. Skjermen kan vise "nål 3 = raud" utan at nål 3 faktisk har raud tråd på seg. Maskina veit ikkje kva farge tråden har - berre kva du har fortalt henne.

WiFi og filoverføring

Maskina har WiFi og USB. WiFi er praktisk når maskina står langt frå PC-en, men USB er meir robust. Ha alltid ein USB-pinne som reserve.

Formater USB-pinnen i FAT32 og hald han rydda. Ein pinne med tusen filer i rotkatalogen gjer det tregt å finne rett design. Lag mapper per kunde.

Feilmeldingar

Dei vanlegaste meldingane du vil sjå:

• Trådbrot på nål N - overtråden er broten eller konusen er tom
• Nål ikkje i topp - maskina står feil for fargeskift, køyr til topp-posisjon
• Utanfor rammegrense - designet er større enn ramma du har vald, eller plasseringa er feil
• Spolen tom / undertrådbrot - på maskiner med undertrådsensor

Skriv ned feilmeldingar du ikkje forstår, og ta kontakt med Kreatek i Volda. Support går gjennom oss som forhandlar, ikkje direkte til Sewtech.