Trådlegging i praksis: rutine, snarvegar og dei vanlege feila

Full trådlegging: fast rutine

Å tre 12 eller 15 nåler frå botnen tek 20-40 minutt første gongen og 10-15 minutt når du har rutine. Du gjer det sjeldan - berre ved oppstart, etter service eller når du legg om heile fargeoppsettet.

Gjer det systematisk, ei nål om gongen, heilt ferdig, før du byrjar på neste. Freistinga er å køyre alle konusane gjennom stativet først, så alle gjennom forspenninga, og så vidare. Ikkje gjer det - då kryssar trådane og du mistar oversikta over kva som er kva.

Rutine per nål:

1. Sett konusen på pinnen, nettstrømpe om nødvendig
2. Rett opp gjennom trådleiaren over konusen
3. Mellom forspenningsskivene
4. Gjennom mellomleiar / trådrøyr
5. Rundt eller mellom hovudspenningsskiva etter mønsteret
6. Over eller gjennom trådbrotdetektoren
7. Under armen på take-up-fjøra
8. Gjennom hòlet i take-up-armen (maskina i topp-posisjon)
9. Gjennom dei nedre leiarane
10. Gjennom nålauget, framfrå og bakover
11. Dra lett - kjenn draget
12. La 5-8 cm henge

Snarvegen: knyte ny tråd til gammal

Skal du berre bytte farge på ei nål der tråden allereie ligg heile vegen, treng du ikkje tre om.

1. Klipp den gamle tråden like over konusen
2. Ta den nye konusen og knyt den nye trådenden til den gamle med ein liten, stram veveknute eller ein enkel dobbeltknute
3. Klipp knuteendane korte - 2-3 mm
4. Dra den gamle tråden forsiktig ned ved nåla til knuten kjem gjennom heile banen
5. Når knuten nærmar seg nålauget, stopp. Klipp av knuten og tre nålauget for hand

Grunnen til punkt 5: knuten går som regel gjennom spenningsskiver og leiarar, men ikkje gjennom nålauget. Prøver du å dra han gjennom, sit han fast eller ryk han - og verre, han kan lage eit hakk i nålauget.

Var knuten for stor eller endane for lange, kan han hekte seg i ei spenningsskive. Då må du tre om heile nåla uansett. Gjer knuten liten.

Dei vanlege feila, samla

Feil som gir floker og løkker på undersida:

• Tråden ligg utanpå ei spenningsskive i staden for mellom
• Take-up-armen er hoppa over
• Take-up-fjøra er broten eller tråden ligg ikkje under henne
• Spolen er lagd feil veg i spolehuset

Feil som gir trådbrot:

• Ein nedre leiar er hoppa over (skrå vinkel inn i nålauget)
• Nåla er bøygd, sliten eller feil montert
• Hakk i nålauget eller i griparspissen
• For stram spenning
• Lo i spenningsskivene
• Tråd som kryssar med nabotråd på stativet
• Gammal, tørr tråd som har stått i sol

Feil som gir at maskina ikkje merkar noko gale:

• Tråden ligg ved sida av trådbrotdetektoren

Feil som gir ujamn stingkvalitet over tid:

• Lo og voks mellom spenningsskivene
• Sliten nål som ikkje er skifta
• Presserfothøgd som ikkje er justert etter materialet
• Manglande smøring av griparen

Rekkjefølgja i feilsøking

Når noko er gale, gjer i denne rekkjefølgja. Det er billegast til dyrast i tid:

1. Sjå på undersida av eit prøvesting - fortel deg spenningsbalansen
2. Sjekk trådbanen visuelt frå konus til nål
3. Byt nål - det tek to minutt og løyser overraskande mykje
4. Tre om heile nåla
5. Sjekk spolen og spolehuset, og legg inn ein ny spole
6. Reingjer griparområdet for lo og sjekk griparspissen med fingernegl
7. Juster spenning - eit kvart hakk om gongen
8. Ring Kreatek om ingenting av dette hjelper

Merk at spenningsjustering kjem nest sist, ikkje først. Dei fleste nybyrjarar byrjar med å skru på spenninga, og det er nesten alltid feil stad å byrje.